غیر مسلموں کے بیت اللہ شریف میں داخلے کی اجازت والی بات جھوٹ نکلی
سوشل میڈیا پرپروپیگنڈا درست نہیں’ وائرل یڈیو نومسلم افراد کے عمرہ کرنے کی ہے، جدہ میں مقیم سینئر صحافی امیر محمد خان
لاہور، اسلام آباد (صباح نیوز)سعودی عرب کی طرف سے غیر مسلموں کو حرم شریف میں داخلے کی اجازت دینے کے حوالہ سے سوشل میڈیا پر پھیلایا گیا پروپیگنڈا جھوٹ نکلا۔ اس حوالہ سے وائرل ہونے والی ویڈیو ان نومسلم افراد کی ہے جو اپنی زندگی کا پہلا عمرہ کر رہے ہیں اور بہت ذوق شوق کے ساتھ بیت اللہ شریف کی زیارت کر رہے ہیں۔ جدہ میں مقیم سینئر صحافی اور پاکستان جرنلسٹ فورم کے چیئرمین امیر محمد خان نے اس بات کی تصدیق کرتے ہوئے کہا ہے کہ سعودی عرب کی طرف سے غیر مسلموں کو حرم میں داخلے کی اجازت دینے والی بات محض جھوٹا پروپیگنڈا ہے ۔ خدانخواستہ ایسی کوئی بات نہیں ہے’ جو پابندی قرآن پاک میں لگائی گئی ہے اسے ختم کرنے کی جسارت کون کر سکتا ہے؟ درحقیقت یہ نومسلم لوگ ہیں جو بیت اللہ شریف میں آئے ہیں اور یقینی طور پر ان کا حق بھی بنتا ہے کہ انہیں حرم شریف میں لایا جائے، یہاں کئی ادارے ایسے کام کر رہے ہیں جو اسلام قبول کرنے والے نومسلم افراد کی اسلامی بنیادوں پر تربیت کر رہے ہیں اور بہت سارے لوگ ایسے ہیں جو روزانہ یہاں مسلمان بھی ہوتے ہیں۔یہ ویڈیو انہی نومسلم افراد کی ہے اورسعودی عرب کی جانب سے ہرگزطور پر کسی غیر مسلم کو حرم میں داخل ہونے کی اجازت نہیں دی گئی۔انہوں نے کہاکہ یہ محض پروپیگنڈا ہے جو سعودی عرب کے خلاف کیا جارہا ہے اور اس کی سرے سے کوئی حقیقت نہیں ہے۔ مملکت سعودی عرب کیخلاف اس قسم کی شیطانیت کا ارتکاب کرنے والے کبھی اپنے مذموم مقاصدمیں کامیاب نہیں ہو سکتے ۔ سینئر صحافی امیر محمد خان کا کہنا تھا کہ سعودی عرب کے خلاف سوشل میڈیا پر مختلف اوقات میں ایسی بے بنیاد خبریں آتی رہتی ہیں جو کہ یقینی طور پر وہ لوگ پھیلا رہے ہیں جو اسلام کی ترویج، اسلام کی ترقی، اور اسلامی دنیا کی سربراہی کے حوالہ سے سعودی عرب کو مضبوط و مستحکم نہیں دیکھنا چاہتے۔ان کا کہنا تھا کہ یہ منافقین ہیں جو مختلف ویب سائٹس اور سوشل میڈیا پراس قسم کا پروپیگنڈا سعودی عرب کے خلاف کرتے ہیں۔ و اضح رہے کہ حالیہ دنوں میں چند نومسلم افراد کی بیت اللہ شریف میں موجودگی کو دکھا کرسوشل میڈیا پر یہ پروپیگنڈا کیا جارہا تھا کہ سعودی عرب نے غیر مسلموں کو حرم شریف میں داخل ہونے کی اجازت دے دی ہے جبکہ حقیقت ہے کہ یہ سب جھوٹا اور بے بنیاد پروپیگنڈا ہے جو کیا گیا ہے۔